مصنف : جاوید احمد غامدی
وادیِ کشمیر
خیال و خامہ
اب یہاں رنگِ بہاراں ہے جوانوں کا لہو
سرخ رو ہیں وادیِ کشمیر میں کوہ و دمن
سر برہنہ بیٹیوں کے پیرہن بکھرے ہوئے
مرثیہ خواں ہر در و دیوار پہ مرغِ چمن
ــــــــــ
موسمِ گل زرد پتوں کی ردا پہنے ہوئے
ڈھونڈتا ہے دخترِ گلمرگ کا عہدِ شباب
آب جووں کا ترنّم نوحۂ غم کی صدا
سرفگندہ وادیوں میں آبشاروں کے رباب
ــــــــــ
چھوڑ جاتی ہے اِدھر بھی وادیِ نیلم کی رات
ہر طرف بارود گولوں کی تباہی کے نشاں
ہند کے اربابِ دانش اب بھی سنتے ہوں اگر
آگ میں جھلسے ہوئے معصوم بچوں کی فغاں
ــــــــــ
پوچھیے اُن سے کہ جمہوری سیاست ہے یہی؟
عہد حاضر میں بھی آزادی کی قیمت ہے یہی؟
ـــــــــــــــــــــــــ