رازداں

فضا خموش، سوادِ فلک ہے تیرہ و تار

کہ لٹ گئی ہے کہیں آبروے چرخِ بریں

نگاہِ قلب کے تاروں میں اختلالِ سرود

مرے وجود میں شاید مرا وجود نہیں

ــــــــــــ

شروعِ وادیِ کاغان میں مقامِ جنوں

مقامِ حاصلِ ایماں ، مقامِ اِلاّ ہو

مری حیاتِ پریشاں کی رفعتوں کا مقام

مری قباے دریدہ کی آرزوے رفو

ــــــــــــ

یہی مقام ہے اُس کا روانِ حق کا مقام

گواہ جس کی صداقت پہ عصمت ِ جبریل

مری نگاہِ تمنا کی جستجو کا کمال

نواحِ مشہدِ احمدؔ ، مقامِ اسمٰعیلؔ

ــــــــــــ

میں اِس مقام کے ذرّوں کو آسماں کہہ دوں

زمیں پہ عرشِ معلّٰی کے رازداں کہہ دوں

ــــــــــــــــــــــــ