غزل

خیال وخامہ

o

یہ مرا سرود کیا ہے؟ تری یاد کا بہانہ

کبھی علم کی حکایت ، کبھی عشق کا فسانہ

وہ خیال میں بھی آئے تو ہجوم عاشقاں تھا

نہ ہوئی وہاں بھی اُن سے رہ و رسم محرمانہ

تری ہر ادا سلامت ، یہ ذرا سی بات کہہ دوں

کبھی چاہیے جنوں کو بھی خرد کا تازیانہ

ترے عہد نو کی دانش نئے بت تراش لائی

مرا لا الٰہ الّا وہی یکتا و یگانہ

یہ جہاں بھی کیا جہاں ہے ، اِسے جس نظر سے دیکھیں

وہی مہر و ماہ و انجم ، وہی گردش زمانہ

تو وطن کا پاسباں ہے ، مجھے کیا گلہ ہو تجھ سے

ترے ہر نفس سے لرزاں مری شاخ آشیانہ

مرے ہر سفر کی غایت وہی سرزمین یثرب

وہ ادب گہ محبت ، وہ دلوں کا آستانہ

____________