البیان: آل عمران ۳: ۱۳۷-۱۴۳ (۲۳)

۲۰۴؎  اشارہ ہے اس شکست کی طرف جس سے احد کے موقع پر مسلمانوں کو اپنی ایک غلطی کی وجہ سے دوچار ہونا پڑا۔

 ۲۰۵؎  یہ اس سنت الہٰی کی طرف اشارہ ہے جس کے تحت رسولوں کے منکرین پر ان کی طرف سے اتمام حجت کے بعد عذاب آجاتا اور ان کے ماننے والوں کواللہ تعالیٰ لازماً غلبہ عطا فرماتے ہیں۔ اس سنت کے مظاہر سرزمین عرب میں عادوثمود، قوم لوط اور قوم شعیب کے آثار کی صورت میں موجود تھے۔ قرآن نے یہاں انھی مظاہر کو سنن سے تعبیر فرمایا ہے۔

 ۲۰۶؎  یعنی بدر کے موقع پر۔

 ۲۰۷؎  اصل میں لفظ ’القوم‘ استعمال ہواہے۔ اہل عرب کے عرف میں یہ اس طرح کے موقعوں پر حریف اور دشمن کے لیے آتا ہے۔

 ۲۰۸؎  اصل میں لفظ ’الایام‘ آیا ہے۔ یہ جب اس طریقے سے جمع کی صورت میں آئے تو اس سے مراد تاریخ کے وہ دن ہوتے ہیں جن میں بڑے بڑے حوادث او ر واقعات پیش آئے ہوں۔

 ۲۰۹؎  یہ ’ولیعلم اللّٰہ الذین اٰمنوا‘ کا معطوف علیہ ہے جو عربیت کے اسلوب پر اصل میں حذف ہو گیا ہے۔

 ۲۱۰؎  اس سے معلوم ہوا کہ احد کے موقع پر جو افتاد پیش آئی، اس میں دوسری مصلحتوں کے ساتھ ایک مصلحت یہ بھی تھی کہ جو لوگ راہ حق میں شہادت کی سعادت حاصل کرنا چاہتے ہیں، ان کی یہ آرزو بھی اس موقع پر پوری ہو جائے۔ اس سے اندازہ کیا جا سکتا ہے کہ اس زمانے میں شہادت کی طلب مسلمانوں کے اندر کتنی شدید تھی کہ اللہ تعالیٰ نے ان کے اس جذبے کی تسکین کے لیے یہ موقع فراہم کرنا ضروری سمجھا۔

 ۲۱۱؎  یعنی اس شکست سے یہ خیال نہ کرو کہ اللہ اب ان منکروں ہی سے محبت کرنے لگا ہے، نہیں، وہ ان ظالموں کو ہرگز پسند نہیں کرتا۔ اس کے پیش نظر کچھ مصالح تھے جن کی وجہ سے اس نے مسلمانوں کی یہ ہزیمت گوارا کی ہے۔

 ۲۱۲؎  جملۂ معترضہ کے بعد یہاں سے کلام پھر اوپر کے بیان سے مربوط ہو گیا ہے۔

 ۲۱۳؎  مطلب یہ ہے کہ منکروں کو مٹانا بھی اسی وقت ممکن تھا، جب وہ بالکل ممیز ہو گئے ہوں، لہٰذا ضروری ہوا کہ لوگوں کو امتحان کی بھٹی سے گزارا جائے تاکہ ہر قسم کا کھوٹ ان کے اندر سے نکل کر علیحدہ ہو۔ چنانچہ مسلمانوں کی شکست، درحقیقت انھی منکروں کو مٹانے کی ایک تدبیر تھی۔

 ۲۱۴؎  یہ پھر ایک جملۂ معترضہ ہے جس سے مخاطبین کو ان کے اس خیال پر برسرموقع تنبیہ کی گئی ہے جو اوپر کی بات سے ان کے ذہن میں پیدا ہوا ہے کہ مومنین اور منکرین کو الگ الگ کرنے کے لیے ہمارے ایمان ہی کو کافی کیوں نہیں سمجھا گیا؟ اس کے لیے یہ کیوں ضروری ہوا کہ لوگوں کو اس طرح کے امتحان سے گزارا جائے؟

 ۲۱۵؎  اصل الفاظ ہیں: ’ویعلم الصٰبرین‘۔ اس کا عطف بھی، صاف واضح ہے کہ ’ولیعلم اللّٰہ الذین اٰمنوا‘ پر ہے او ر اس کے اور ’یمحق الکافرین‘ کے درمیان کا جملہ جملۂ معترضہ ہے جو مخاطبین کے ایک خیال پر، جیسا کہ بیان ہوا، برسرموقع تنبیہ کے لیے آگیا ہے۔

 ۲۱۶؎  یہ مخاطبین کی طرف سے شوق جہاد کے اظہار اور اللہ کی راہ میں اپنی جان قربان کر دینے کے ان دعووں پر تعریض ہے جو وہ احد کے معرکے میں اترنے سے پہلے کر رہے تھے۔

[              باقی]

 ـــــــــــــــــــ