البیان: البقرہ ۲: ۱۹۵-۱۹۶ (۴۰)

۵۲۹؎ اصل میں ’ولا تلقوا بایدیکم الی التھلکۃ‘ کے الفاظ آئے ہیں ـ۔ ان میں ’التھلکۃ‘ مصدر ہے اور ’بایدیکم‘ سے پہلے ’انفسکم‘ کا لفظ عربیت کے اسلوب پر حذف ہو گیا ہے ۔ سورۂ توبہ (۹) کی آیت ۴۲ میں یہی بات ’یھلکون انفسکم‘ کے الفاظ میں ادا کی گئی ہے ۔ استاذ امام کے الفاظ میں اس سے ایک ایسے شخص کی تصویر نگاہوں کے سامنے آتی ہے جو اوپر سے نیچے کی طرف اپنے دونوں ہاتھ پھیلائے ہوئے کسی دریا یا غار میں چھلانگ لگا رہا ہو۔ مطلب یہ ہے کہ جو لوگ اس طرح کے موقعوں پر جان و مال کی قربانی سے جی چراتے ہیں ، وہ درحقیقت اپنے آپ کو ہلاکت میں ڈال رہے ہوتے ہیں ۔ اس لیے کہ زندگی اور مال کے حریص جس چیز کو کامیابی سمجھتے ہیں ، اللہ کی نگاہ میں وہی ہلاکت ہے ۔

۵۳۰؎ اصل میں لفظ ’احسنوا‘ آیا ہے ۔ اس کا عطف ’انفقوا‘ پر ہے ۔ یعنی اللہ کی راہ میں اپنا پسندیدہ مال خرچ کرو اور اسے پورے جوش و جذبہ اور دل کی آمادگی کے ساتھ خرچ کرو ۔ انفاق کا یہی طریقہ اللہ کو پسند ہے ۔ قرآن کے بعض دوسرے مقامات پر بھی اس کے بارے میں اسی بات کی تاکید کی گئی ہے ۔

۵۳۱؎ان عبادات کا ذکر یہاں جس طریقے سے ہواہے ، اس سے واضح ہے کہ اہل عرب کے لیے یہ کوئی اجنبی چیزیں نہ تھیں ۔ ان کی تاریخ سے بھی یہی بات معلوم ہوتی ہے کہ حج و عمرہ کے مناسک اور حدود و آداب سے وہ پوری طرح واقف تھے۔ اس میں شبہ نہیں کہ ان میں بعض بدعات انھوں نے داخل کر دی تھیں، لیکن وہ جانتے تھے کہ یہ عبادات کیا ہیں ۔ قرآن نے اسی بنا پر ان کی تفصیل نہیں کی ۔ اس کا بیان اس معاملے میں بدعات کی اصلاح اور ان کے مناسک سے متعلق بعض ضروری توضیحات تک ہی محدود ہے ۔

۵۳۲؎ اصل الفاظ ہیں : ’و اتموا الحج والعمرۃ للّٰہ ‘ ۔یعنی اس صورت میں کوئی رعایت نہ ہو گی ۔ تمام مناسک ، جس طرح کہ وہ ہیں ، اسی طرح پورے کیے جائیں گے ۔ اس جملے میں زور لفظ ’للّٰہ‘ پر ہے ۔ یعنی حج و عمرہ کی یہ عبادات صرف اللہ وحدہ لاشریک کے لیے ہونی چاہییں۔ اس تنبیہ کی ضرورت اس لیے پیش آئی کہ اہل عرب کے لیے یہ دونوں عبادت سے زیادہ تجارت کا ذریعہ بن گئی تھیں اور ان کا حج و عمرہ صرف اللہ ، پروردگار عالم ہی کے لیے نہیں ہوتا تھا، بلکہ ان کے وہ معبودان باطل بھی اس میں شریک تھے جن کے بت انھوں نے عین بیت الحرام میں بھی اور حج کے دوسرے مقامات پر بھی نصب کر دیے تھے۔

۵۳۳؎ اس سے آگے ’فاذا امنتم‘کے جو الفاظ آئے ہیں ، ان سے واضح ہے کہ اس سے مراد یہاں دشمن کی طرف سے گھیر لیا جانا ہے ، لیکن یہی صورت بعض دوسرے موانع کی وجہ سے پیش آ جائے تو اس کا حکم بھی ، ظاہر ہے کہ اس سے مختلف نہیں ہونا چاہیے ۔

۵۳۴ ؎ یعنی اس صورت میں قربانی پیش کرنا ضروری ہو گا اور مجبوری کی اس حالت میں یہ حج و عمرہ کے تمام مناسک کی قائم مقام ہو جائے گی ۔

۵۳۵؎ عام حالات میں قربانی کی جگہ اور وقت ، دونوں متعین ہیں ، لیکن جس صورت کا یہاں ذکر ہے ، اس میں قربانی کے پہنچنے کی جگہ وہی ہے ، جہاں کوئی شخص گھر جائے ۔ صلح حدیبیہ کے موقع پر نبی صلی اللہ علیہ وسلم کے عمل سے بھی اسی بات کی تائید ہوتی ہے ۔

۵۳۶؎ اصل میں ’ففدیۃ من صیام اوصدقۃ اونسک‘کے الفاظ آئے ہیں ۔ ان کا یہ اسلوب دلیل ہے کہ فدیے کی تعداد اور مقدار کا معاملہ لوگوں کی صواب دید پر چھوڑ دیا گیا ہے ۔ بخاری کی روایت (رقم ۱۸۱۴) ہے کہ نبی صلی اللہ علیہ وسلم سے اس کے متعلق پوچھا گیا تو آپ نے فرمایا : تین روزے رکھ لیے جائیں یا ۶ مسکینوں کو کھانا کھلا دیا جائے یا ایک بکری ذبح کر دی جائے تو کافی ہو جائے گا۔

۵۳۷؎ اس سے واضح ہے کہ آدمی کے لیے ممکن ہو تو بہتر یہی ہے کہ وہ عمرہ کے لیے الگ اور حج کے لیے الگ سفر کرے۔ ایک ہی سفر میں پہلے عمرہ اور اس کے بعد احرام کھول کر حج کی تاریخوں میں اس کے لیے نیا احرام باندھ کر حج کرنا حدود حرم کے باہر سے آئے ہوئے عازمین حج کے لیے محض ایک رخصت ہے جو اللہ تعالیٰ نے دو مرتبہ سفر کی زحمت کے پیش نظر انھیں مرحمت فرمائی ہے ۔ اس پر فدیہ اسی لیے لازم کیا گیا ہے ۔ چنانچہ اس رخصت سے فائدہ بھی ہر مسلمان کو اسے رخصت سمجھ کر ہی اٹھانا چاہیے ۔

[باقی]

ــــــــــــــــــــــ