البیان: الحجر ۱۵: ۲۶- ۴۸ (۲)

۵۹؎ یہ آگے کی بات کے لیے تمہید ہے اور ابلیس و آدم کی بناے مخاصمت کو واضح کرنے کے لیے بیان کی گئی ہے۔ اِس سے اِن مخلوقات کے عناصر خلقت کا سراغ دینا مقصود نہیں ہے۔ تاہم اتنی بات اِس سے یقینا واضح ہو جاتی ہے کہ انسانوں سے پہلے اللہ تعالیٰ نے جنوں کو لو کی لپٹ سے پیدا کیا۔پھر انسان کو مٹی سے بنانے کا فیصلہ کیا تو اُس کا حیوانی وجود بالکل اُسی طرح زمین کے پیٹ میں تخلیق فرمایا، جس طرح وہ اب ماں کے پیٹ میں تخلیق کیا جاتا ہے۔ قرآن کے اشارات سے معلوم ہوتا ہے کہ اِس کی صورت غالباً یہ ہوئی کہ دریاؤں اور سمندروں کے کنارے کی کیچڑ میں کسی جگہ نطفہ کے قسم کی کوئی چیز پیدا ہوئی جس کے اوپر کی کیچڑ خشک ہو کر بیضے کی شکل اختیار کر گئی۔ قرآن نے اِسی کو کھنکھناتی مٹی سے تعبیر کیا ہے۔ تخلیق کے مختلف مراحل سے گزر کر انسان اُس بیضے سے اُسی طرح نمودار ہو گیا، جس طرح انڈوں سے بچے نکلتے ہیں۔ تمام جان دار پہلے مرحلے میں غالباً اِسی طریقے سے پیدا کیے گئے۔ پھر اُن کا تسویہ ہوا اور اُن میں اپنی نسل آپ پیدا کر لینے کی صلاحیت ودیعت کر دی گئی۔ قرآن مجید میں ’اَنْشَاَکُمْ مِّنَ الْاَرْضِ*‘ اور ’اَنْبَتَکُمْ مِّنَ الْاَرْضِ نَبَاتًا**‘کی تعبیرات اِسی حقیقت کی طرف اشارہ کرتی ہیں۔

۶۰؎ یہ امور متشابہات میں سے ہے جن کی حقیقت اللہ کے سوا کوئی نہیں جانتا۔ تاہم اتنی بات واضح ہے کہ یہی وہ لطیف پھونک ہے جس سے انسان کے حیوانی وجود میں وہ چیز داخل ہوئی جسے انسان کہا جاتا ہے۔ ماں کے پیٹ میں بھی یہ اِسی مرحلے میں پھونکی جاتی ہے۔ اِس سے پہلے انسان، انسان نہیں ہوتا، صرف ایک حیوان ہوتا ہے جو تخلیق کے مختلف مراحل سے گزرکر انسانی شخصیت کے لیے ایک ایسا قالب بن جاتا ہے کہ اب اُس میں یہ روح پھونک دی جائے۔

۶۱؎ یہ حکم امتحان کے لیے دیا گیا۔ اِس سے مقصود یہ تھا کہ آدم پر واضح ہوجائے کہ اصلی سرفرازی نور یا نار سے پیدا ہونے میں نہیں، بلکہ اللہ تعالیٰ کی اطاعت اور فرماں برداری میں ہے۔

۶۲؎ آگے ’اِلَّا ٓاِبْلِیْسَ‘کے الفاظ ہیں۔ قرآن میں صراحت ہے کہ ابلیس جنات میں سے تھا۔ اِس سے آپ سے آپ واضح ہوا کہ جنات چونکہ اپنی خلقت کے لحاظ سے فرشتوں سے زیادہ دور نہیں ہیں، اِس لیے اُنھیں جب سجدے کا حکم دیا گیا تو علیٰ سبیل التغلیب جنات بھی اِس حکم میں شامل تھے۔ یہ بات چونکہ ’اِلاَّ ٓاِبْلِیْسَ‘ کے استثنا سے واضح ہو جاتی ہے، اِس لیے قرآن نے اِسے الفاظ میں بیان نہیں کیا۔

۶۳؎ انسان جب علم، دولت، حسن یا اقتدار میں اپنے آپ کو دوسروں سے برتر دیکھتا ہے تو ابلیس کا یہی استدلال ہے جو اُسے حق کے مقابل میں اکڑنے پر آمادہ کرتا ہے۔ اپنی خلقت کے لحاظ سے فرشتے جنات سے بھی برتر تھے، مگر اُنھوں نے یہ احمقانہ استدلال نہیں کیا، بلکہ سجدے کے حکم کو خدا کا امتحان سمجھا اور بغیر کسی تردد کے امتثال امر کے لیے تیار ہو گئے۔

۶۴؎ یعنی آسمان سے، جہاں ابلیس بھی فرشتوں کے ساتھ خدا کی بارگاہ میں حاضر تھا۔ عربی زبان میں آسمان کے لیے ’السَّمَآء‘کا لفظ ہے۔ آیت میں ’ھَا‘ کی ضمیر اِسی کے لیے آئی ہے۔

۶۵؎ آیت میں اِس کے لیے ’بِمَآ اَغْوَیْتَنِیْ‘کے الفاظ آئے ہیں۔ ابلیس نے یہ بات کیوں کہی؟ استاذ امام لکھتے ہیں:

”’اِغْوَا‘ کے معنی گمراہ کرنے کے ہیں۔ چونکہ ابلیس آدم کو سجدہ نہ کرنے کے معاملے میں اپنے آپ کو بجانب حق خیال کرتا تھا،اِس وجہ سے اُس نے نہایت گستاخانہ انداز میں فعل ’اِغْوَا‘ کو اللہ تعالیٰ ہی کی طرف منسوب کیا۔ مطلب یہ کہ اگر میں اِس حکم کی عدم تعمیل کے باعث سے گمراہ ٹھیرا تو اِس میں میرا قصور نہیں ہے، بلکہ یہ حکم ہی ایسا تھا کہ میں اِس کی تعمیل نہیں کر سکتا تھا۔ اِس وجہ سے اگر میں اِس کے سبب سے گمراہ ہوا تو اِس پر تو نے ہی مجھے مجبور کیا۔“(تدبرقرآن۴/ ۳۵۹)    

۶۶؎ اصل الفاظ ہیں:’ھٰذَا صِرَاطٌ عَلَیَّ مُسْتَقِیْمٌ‘۔ اِن میں ’صِرَاط‘ کے بعد ’عَلٰی‘ عربیت کے خاص اسلوب کے مطابق آیا ہے۔ قرآن اور کلام عرب، دونوں کے شواہد سے معلوم ہوتا ہے کہ عربی زبان میں یہ اسلوب اُس وقت اختیار کیا جاتا ہے، جب کسی راستے کے بارے میں یہ بتانا مقصود ہو کہ وہ ایسا سیدھا ہے کہ اپنے رہرووں کو خود منزل پر لا ڈالتا ہے۔

۶۷؎ اِس سے یہ حقیقت واضح ہو گئی کہ شیطان اُنھی کو گمراہ کر سکتا ہے جو خود گمراہ ہونا چاہتے ہوں۔ اللہ کے جو بندے گمراہی سے بچنے کا ارادہ کر لیں اور سیدھی راہ کے سچے طالب بن کر زندگی بسر کریں، اُن پر اُس کی ترغیبات کبھی اِس درجے میں اثر انداز نہیں ہوتیں کہ وہ کسی ایسی گمراہی میں پڑ جائیں جو باعث ہلاکت ہو۔

۶۸؎ اصل الفاظ ہیں: ’اِنَّ جَھَنَّمَ لَمَوْعِدُھُمْ اَجْمَعِیْنَ‘۔ اِن میں زور لفظ ’اَجْمَعِیْن‘ پر ہے۔ اللہ تعالیٰ نے یہ لفظ ابلیس کے قول ’لَاُغْوِیَنَّھُمْ اَجْمَعِیْنَ‘ کے جواب میں استعمال فرمایا ہے۔ اُس نے بڑے طنطنے کے ساتھ دعویٰ کیا کہ میں سب کوگمراہ کرکے چھوڑوں گا۔ اُس کے جواب میں اللہ تعالیٰ نے اُسی زور کے ساتھ فرمایا کہ پھر میں بھی اُن سب کو جہنم رسید کرنے میں کوئی کسر نہ اٹھا رکھوں گا۔

۶۹؎ مطلب یہ ہے کہ کوئی یہ خیال نہ کرے کہ ایسی جہنم کہاں سے مہیا ہو گی جو اتنے سب لوگوں کو اپنے اندر سمیٹ لے۔ اِس طرح کے مجرموں کے لیے جو جہنم تیار کی گئی ہے، وہ ایسی وسیع ہے کہ اُس کے سات دروازے ہوں گے جن سے جہنمیوں کے گروہ اُن کے جرائم کے لحاظ سے الگ الگ داخل کیے جائیں گے۔ قرآن نے جن چیزوں کو اصلی مہلکات قرار دیا ہے، وہ اگر شمار کی جائیں تو سات عنوانات کے تحت آجاتی ہیں ***۔ شیطان اُنھی میں سے کسی ایک یا سب میں مبتلا کرکے لوگوں کو جہنم کے راستے پر ڈالتا ہے۔ یہ درجہ بندی غالباً اِنھی مہلکات کے لحاظ سے ہو گی۔

۷۰؎ یہ کس درجے کی نعمت ہے؟ استاذ امام لکھتے ہیں:

”...بہتر سے بہتر عیش و آرام کی زندگی بھی کسی کو حاصل ہو، لیکن اُس میں تجدد و تنوع نہ ہو تو آدمی بجھ کے رہ جاتا ہے۔ جنت میں اہل جنت کو اِس صورت حال سے سابقہ پیش نہیں آئے گا۔ اُس میں ابدی عیش و آرام کی زندگی بھی ہو گی اور ہر لمحہ خدا کی نعمتوں میں ایسی گوناگونی و بو قلمونی بھی ہو گی کہ اہل جنت کی طبیعت کبھی اُس سے اچاٹ نہیں ہو گی۔“(تدبرقرآن۴/ ۳۶۲) 

[باقی]

__________

  * ہود ۱۱: ۶۱۔ النجم۵۳: ۳۲۔ ”اُس نے تمھیں زمین سے پیدا کیا۔“

**  نوح ۷۱: ۱۷۔ ”اللہ ہی نے تمھیں خاص اہتمام کے ساتھ زمین سے اگایا۔“

***  بنی اسرائیل۱۷: ۲۲-۳۹۔

_____________________