البیان: آل عمران ۳: ۱۶۵-۱۷۵ (۲۷)

بسم اللہ الرحمٰن الرحیم 

(گزشتہ سے پیوستہ)  

اَوَلَمَّآ اَصَابَتْکُمْ مُّصِیْبَۃٌ، قَدْ اَصَبْتُمْ مِّثْلَیْْہَا، قُلْتُمْ: اَنّٰی ہٰـذَا؟ قُلْ: ہُوَ مِنْ عِنْدِ اَنْفُسِکُمْ، اِنَّ اللّٰہَ عَلٰی کُلِّ شَیْْئٍ قَدِیْرٌ{۱۶۵} وَمَآ اَصَابَکُمْ یَوْمَ الْتَقَی الْجَمْعٰنِ، فَبِاِذْنِ اللّٰہِ، وَلِیَعْلَمَ الْمُؤْمِنِیْنَ{۱۶۶} وَلِیَعْلَمَ الَّذِیْنَ نَافَقُوْا، وَقِیْلَ لَہُمْ: تَعَالَوْا قَاتِلُوْا فِیْ سَبِیْلِ اللّٰہِ، اَوِ ادْفَعُوْا، قَالُوْا: لَوْ نَعْلَمُ قِتَالاً لاَّ تَّبَعْنٰکُمْ، ہُمْ لِلْکُفْرِ یَوْمَئِذٍ اَقْرَبُ مِنْہُمْ لِلْاِیْمَانِ، یَقُوْلُوْنَ بِاَفْوَاہِہِمْ مَّا لَیْْسَ فِیْ قُلُوْبِہِمْ، وَاللّٰہُ اَعْلَمُ بِمَا یَکْتُمُوْنَ{۱۶۷} اَلَّذِیْنَ قَالُوْا لِاِخْوَانِہِمْ، وَقَعَدُوْا، لَوْ اَطَاعُوْنَا مَا قُتِلُوْا، قُلْ: فَادْرَئُ وْا عَنْ اَنْفُسِکُمُ الْمَوْتَ، اِنْ کُنْتُمْ صٰدِقِیْنَ{۱۶۸}

وَلاَ تَحْسَبَنَّ الَّذِیْنَ قُتِلُوْا فِیْ سَبِیْلِ اللّٰہِ اَمْوَاتًا، بَلْ اَحْیَآئٌ عِنْدَ رَبِّہِمْ، یُرْزَقُوْنَ{۱۶۹} فَرِحِیْنَ بِمَآ اٰتٰہُمُ اللّٰہُ مِنْ فَضْلِہٖ، وَیَسْتَبْشِرُوْنَ بِالَّذِیْنَ لَمْ یَلْحَقُوْا بِہِمْ مِّنْ خَلْفِہِمْ اَلاَّ خَوْفٌ عَلَیْْہِمْ وَلاَ ہُمْ یَحْزَنُوْنَ{۱۷۰} یَسْتَبْشِرُوْنَ بِنِعْمَۃٍ مِّنَ اللّٰہِ وَفَضْلٍ، وَّاَنَّ اللّٰہَ لاَ یُضِیْعُ اَجْرَ الْمُؤْمِنِیْنَ{۱۷۱} اَلَّذِیْنَ اسْتَجَابُوْا لِلّٰہِ وَالرَّسُوْلِ مِنْ بَعْدِ مَآ اَصَابَہُمُ الْقَرْحُ، لِلَّذِیْنَ اَحْسَنُوْا مِنْہُمْ وَاتَّقَوْا اَجْرٌ عَظِیْمٌ{۱۷۲} اَلَّذِیْنَ قَالَ لَہُمُ النَّاسُ: اِنَّ النَّاسَ قَدْ جَمَعُوْا لَکُمْ فَاخْشَوْہُمْ، فَزَادَہُمْ اِیْمَانًا، وَّقَالُوْا: حَسْبُنَا اللّٰہُ وَنِعْمَ الْوَکِیْلُ{۱۷۳} فَانْقَلَبُوْا بِنِعْمَۃٍ مِّنَ اللّٰہِ وَفَضْلٍ، لَّمْ یَمْسَسْہُمْ سُوْٓئٌ، وَّاتَّبَعُوْا رِضْوَانَ اللّّٰہِ، وَاللّٰہُ ذُوْ فَضْلٍ عَظِیْمٍ{۱۷۴} اِنَّمَا ذٰلِکُمُ الشَّیْْطٰنُ یُخَوِّفُ اَوْلِیَآئَ ہٗ فَلاَ تَخَافُوْہُمْ، وَخَافُوْنِ، اِنْ کُنْتُمْ مُّؤْمِنِیْنَ{۱۷۵}

 اور (ہاں)، جب ایک مصیبت تمھیں پہنچی جس سے دوگنی مصیبت (اِس سے پہلے بدر میں) تم نے (اُنھیں) پہنچائی تھی تو کیا یہ بات بھی تم نے کہی کہ یہ کہاں سے آگئی؟ ۲۴۷ اِن سے کہہ دو، (اے پیغمبر) کہ یہ تمھاری اپنی ہی لائی ہوئی ہے۔ (اللہ فتح دیتا ہے تو اپنی حکمت کے مطابق شکست بھی دلواتا ہے)، اِس لیے کہ اللہ ہر چیز پر قدرت رکھتا ہے۔ ۲۴۸ اور (مزید یہ کہ) جب دونوں فوجیں بھڑیں تو اُس دن جو مصیبت تم پر آئی، وہ اللہ کے اذن سے آئی اور اِس لیے آئی کہ اللہ اُن کو بھی دیکھ لے جو سچے مومن ہیں اور اُن کو بھی جو (ابتدا ہی سے) منافقت اختیار کیے ہوئے تھے اور اُن سے کہاگیا کہ آؤ، اللہ کی راہ میں جنگ کرو یا کم سے کم (اپنے شہر کی) مدافعت ہی کرو تو اُنھوں نے کہا تھا کہ اگر ہم جانتے کہ جنگ ہونی ہے تو ضرور تمھارے ساتھ چلتے۔ اُس دن ایمان سے زیادہ یہ کفر کے قریب تھے۔ یہ اپنے منہ سے وہ باتیں کہہ رہے تھے جو اِن کے دل میں نہیں تھیں اور اللہ خوب واقف تھا اُس سے جو یہ چھپائے ہوئے تھے۔ یہی جو بیٹھے رہے اور اپنے (اُن) بھائیوں کے بارے میں (جو لڑنے کے لیے نکلے) کہہ دیا کہ اگر وہ ہماری بات مان لیتے تو (اِس طرح) قتل نہ ہوتے۔ ۲۴۹ اِن سے کہہ دو کہ اپنی موت کو ٹال کر دکھانا، اگر تم سچے ہو۔ ۱۶۵ــ ۱۶۸

(اِن باتوں کی پروا نہ کرو، اے پیغمبر) اور (اِس جنگ کے دوران میں) جو لوگ اللہ کی راہ میں قتل ہوئے ہیں، اُنھیں ہرگز مردہ خیال نہ کرو۔ (وہ مردہ نہیں)، بلکہ اپنے پروردگار کے حضور میں زندہ ہیں، اُنھیں روزی مل رہی ہے۔ اللہ نے جو کچھ اپنے فضل میں سے اُنھیں عطا فرمایا ہے، اُس پر شاداں و فرحاں، اُن کے اخلاف میں سے جو لوگ ابھی اُن سے نہیں ملے، اُن کے بارے میں بشارت حاصل کرتے ہوئے کہ (خدا کی اِس ابدی بادشاہی میں) اُن کے لیے نہ کوئی خوف ہے اور نہ وہ کبھی غم زدہ ہوں گے، اللہ کی نعمتوں اور اُس کے فضل سے خوش وقت اور اِس بات سے کہ ایمان والوں کے اجر کو اللہ کبھی ضائع نہ کرے گا،۲۵۰ اُن لوگوں کے اجر کو جنھوں نے چوٹ کھانے کے بعد بھی اللہ اور اُس کے رسول کی آواز پر لبیک کہی ہے۔۲۵۱ اُن میں سے جنھوں نے خوبی سے کام کیے اور خدا سے ڈرتے رہے،۲۵۲ اُن کے لیے بہت بڑا اجر ہے۔ یہ وہ ہیں کہ جنھیں لوگوں نے کہا کہ تمھارے خلاف بڑی قوت جمع ہوگئی ہے، اُس سے ڈرو تو اُن کا ایمان یہ سن کر اور بڑھ گیا اور اُنھوں نے جواب دیا کہ ہمارے لیے اللہ کافی ہے اور وہ بہترین کارساز ہے۔۲۵۳ سو وہ اللہ کی نعمت اور اُس کا فضل لے کر (اِس مہم سے) واپس آئے، اُن کو کوئی گزند نہیں پہنچا اور وہ اللہ کی خوشنودی کے طلب گار ہوئے اور (حقیقت یہ ہے کہ) اللہ بڑی عنایت کرنے والا ہے۔ (اب یہ بات تو تم پر واضح ہوگئی کہ) یہ شیطان ہے جو اپنے ساتھیوں کے ڈراوے دے رہا تھا۔۲۵۴ سو اِن سے مت ڈرو، اگر تم سچے مومن ہو تو صرف مجھ سے ڈرو۔ ۱۶۹ــ ۱۷۵