غزل

خیال وخامہ

o

اُن کا ایما کہ مرا جذبۂ پیدائی تھا

ایک عالم تھا کہ پھر اُس کا تماشائی تھا

اُن کی دہلیز پہ ہوں ، عرش بریں ہے شاید

رہنمائی کے لیے ذوق جبیں سائی تھا

توڑ کر پھینک دیا ایک ادا سے تو نے

اب یہ کہتے ہو ، وہی باغ کی رعنائی تھا

کس کو ہوتا ہے یہاں قیس کا انداز نصیب!

آپ کے شہر میں یہ ایک ہی سودائی تھا

علم کو دیکھ لیا ، حسن بتاں بھی دیکھا

شوق جس رنگ میں تھا ، باعث رسوائی تھا

تو نے قرآن سے مانگی ہے کبھی چوب کلیم؟

تیرے ہاتھوں میں یہ اِک شعلۂ سینائی تھا

ہم بھی گزرے تھے ، یہی دشت سیاست تھا ، مگر

جس کو سمجھا تھا کہ پربت ہے ، وہی رائی تھا

جب بھی چاہا ، وہ کبھی خواب میں آئے ہوتے

میرے دامن میں کوئی لالۂ صحرائی تھا

تو نے اُس کو بھی ، مری جان ، کہاں بخشا ہے

جس کا ہر سانس ترے حق میں مسیحائی تھا

____________