مصیبت کے وقت کی دعا

عَن أُمِّ سَلَمَۃَ زَوْجِ النَّبِیِّ صَلَّی اللہُ عَلَیْہِ وَسَلَّمَ تَقُولُ: سَمِعْتُ رَسُولَ اللہِ صَلَّی اللہُ عَلَیْہِ وَسَلَّمَ یَقُولُ: مَا مِنْ عَبْدٍ تُصِیبُہُ مُصِیبَۃٌ، فَیَقُولُ: إِنَّا لِلَّہِ وَإِنَّا إِلَیْہِ رَاجِعُونَ،اللہُمَّ أْجُرْنِی فِی مُصِیبَتِی، وَأَخْلِفْ لِی خَیْرًا مِنْہَا، إِلَّا أَجَرَہُ اللہُ فِی مُصِیبَتِہِ، وَأَخْلَفَ لَہُ خَیْرًا مِنْہَا، قَالَتْ: فَلَمَّا تُوُفِّیَ أَبُو سَلَمَۃَ، قُلْتُ: کَمَا أَمَرَنِی رَسُولُ اللہِ صَلَّی اللہُ عَلَیْہِ وَسَلَّمَ، فَأَخْلَفَ اللہُ لِی خَیْرًا مِنْہُ، رَسُولَ اللہِ صَلَّی اللہُ عَلَیْہِ وَسَلَّمَ. (رقم۲۱۲۷)
نبی صلی اللہ علیہ وسلم کی زوجہ،ام سلمہ بیان کرتی ہیں کہ میں نے آپ سے سن رکھا تھاکہ جوکوئی مصیبت میں گرفتارہوجانے پر إنا للہ وإنا إلیہ راجعون پڑھے اوراس کے بعدیہ کلمات کہے: أللھم أجرنی فی مصیبتی واخلف لی خیرًا منہا کہ اے اللہ ،مجھے میری اس مصیبت میں بھی اجرعطافرمااور کھوجانے والی نعمت سے اچھی نعمت عطافرماتواللہ اس مصیبت میں اس کو اجراوراس نعمت سے اچھی نعمت عطا فرما دیتاہے۔
وہ بیان کرتی ہیں کہ جب( میرے شوہر)،ابوسلمہ کاانتقال ہواتومیں نے یہ کلمات اسی طرح پڑھے، جس طرح رسول اللہ صلی اللہ علیہ وسلم نے سکھائے تھے۔چنانچہ اللہ نے مجھے رسول اللہ کی صورت میں ابوسلمہ سے بھی اچھابدل عطافرمادیا۔

____________