کیا کیا چیز سنت ہے؟

سوال: رسول اللہ صلی اللہ علیہ وسلم کے کون کون سے اعمال سنت میں شامل ہیں؟ (غلام یاسین)

جواب: اس سوال کے جواب میں استاد محترم کی کتاب’’میزان‘‘ سے ایک اقتباس نقل کر رہا ہوں۔ اس میں انھوں نے ان چیزوں کو ایک ترتیب سے بیان کر دیا ہے جو ان کے نزدیک نبی صلی اللہ علیہ وسلم نے بحیثیت سنت جاری کی ہیں۔ اس فہرست کا مطالعہ کرنے کے لیے ضروری ہے کہ آپ ان کی سنت کی تعریف کو ذہن میں رکھیں۔ لکھتے ہیں:

’’اِس (سنت) ذریعے سے جو دین ہمیں ملا ہے ، وہ یہ ہے:

عبادات

۱۔ نماز۔ ۲۔ زکوٰۃ اور صدقۂ فطر۔ ۳۔ روزہ و اعتکاف۔ ۴۔ حج و عمرہ۔ ۵۔ قربانی اور ایام تشریق کی تکبیریں۔

معاشرت

۱۔ نکاح و طلاق اور اُن کے متعلقات۔ ۲۔ حیض و نفاس میں زن و شو کے تعلق سے اجتناب۔

خور و نوش

۱۔ سؤر، خون، مردار اور خدا کے سوا کسی اور کے نام پر ذبح کیے گئے جانور کی حرمت۔ ۲۔اللہ کا نام لے کر جانوروں کا تذکیہ۔

رسوم و آداب

۱۔ اللہ کا نام لے کر اور دائیں ہاتھ سے کھانا پینا۔ ۲۔ ملاقات کے موقع پر ’السلام علیکم‘ اور اُس کا جواب۔ ۳۔ چھینک آنے پر ’الحمد للہ‘ اور اُس کے جواب میں ’یرحمک اللہ‘۔ ۴۔ نومولود کے دائیں کان میں اذان اور بائیں کان میں اقامت۔ ۵۔ مونچھیں پست رکھنا۔ ۶۔ زیر ناف کے بال کاٹنا۔ ۷۔ بغل کے بال صاف کرنا۔ ۸۔ بڑھے ہوئے ناخن کاٹنا۔ ۹۔ لڑکوں کا ختنہ کرنا۔ ۱۰۔ ناک، منہ اور دانتوں کی صفائی۔ ۱۱۔ استنجا۔ ۱۲۔ حیض و نفاس کے بعد غسل۔ ۱۳۔ غسل جنابت۔ ۱۴۔ میت کا غسل۔ ۱۵۔ تجہیز و تکفین۔ ۱۶۔ تدفین۔ ۱۷۔ عید الفطر۔ ۱۸۔ عیدالاضحی۔‘‘(میزان۱۴)

____________